कोल्हापूर : ‘इंटिग्रेटेड लीगसी’ या कोल्हापूरच्या सुप्रसिद्ध बँडने आणखी एका आंतरराष्ट्रीय स्तरावरील गाण्याची निर्मिती केली आहे. ‘ए बंदेया’ हे नवीन, फ्रेश गाणे ‘इंटिग्रेटेड लीगसी’ने त्यांचे नुकतेच लाँच केले आहे. सकारात्मकतेवर भाष्य करणारे हे गाणे यू-ट्यूब, आयट्यून्स, स्पॉटिफाय, सावन, शाहजाम, अॅपल म्युझिक, साउंड क्लाउड यांसारख्या साइट्सवर उपलब्ध झाले आहे.
‘इंटिग्रेटेड लीगसी’चे तरुण आपल्या प्रत्येक गाण्यातून काही ना काही सामाजिक संदेश देण्याचा प्रयत्न करत असतात. ‘ए बंदेया’मधून तरुणांना निराशा झटकून पुन्हा नव्या जोमाने ध्येयाकडे वाटचाल करण्याचा संदेश देण्यात आला आहे. सध्या छोट्या मोठ्या कारणाने खचून जाण्याची वृत्ती तरुणांमध्ये दिसून येते. त्यातून बाहेर पडण्यासाठी हे गाणे नक्कीच प्रेरणादायी ठरू शकते.
कोल्हापूरच्या तरुणांनी एकत्र येऊन ‘इंटिग्रेटेड लीगसी’ या बँडची स्थापना केली आहे. प्रथमेश देसाई (की-बोर्डिस्ट) अक्षय पाटील (लीड गिटारिस्ट), अनुराग राठोड (व्होकलिस्ट, ऱ्हिदम गिटारिस्ट), सोहम येवले (बेसिस्ट), रोहन कुलकर्णी (ड्रमर) यांचा या रॉक बँडमध्ये समावेश आहे.